Rev 8 | MED | STEP | Wote, Sipsip Waⱡ ni ndi, kan 7 ti buk ei, imp moⱡpa pitim ni, koⱡmung elinga mel, muⱡ kona ni tiyu nimba telinga, ant mong tenda ei mel itim.

Revelation of John 8

Sipsip Waⱡ Ei Ndi, Kan 7 Ei Koⱡmung Itim

1 Wote, Sipsip Waⱡ ni ndi, kan 7 ti buk ei, imp moⱡpa pitim ni, koⱡmung elinga mel, muⱡ kona ni tiyu nimba telinga, ant mong tenda ei mel itim.

2 Wote, na ndi kᵾndᵾr mel, anggelo 7 kat, Got nga kuimp keta ila anggilik mormin ni kᵾⱡ, pikul 7 kat nguⱡungina tᵾk ambrung.

3 Ei kᵾn, anggelo ti ndi omba, rat pol wingti ila nondpa anggilpa kᵾn, ming gol ndip ikil mura rui ei, ambuⱡpa moⱡnga kᵾn, ikil mel mura rui na mbᵾ nga mat, puⱡi nguⱡina kᵾn, Got nga wamp atinga rormᵾn mbᵾ kᵾn, tᵾpa rak ndupa, Got nga rat pol gol ila rᵾpᵾndi pol ei nga kuimbal tetᵾm nila, angge nimba ngurum. 4 Ni kᵾn, ndip ikil mura rui na, atinga na mbᵾ ndi, anggelo nga ki raⱡ ndi, wak rok kᵾn, Got nga kuimp keta ila oⱡa purum. 5 Wote, anggelo ei ndi, ndip ikil mura rui ming ei tᵾpa kᵾn, rat pol wingti ila ndip ei, tᵾpa ming ila ruk ndupa kᵾn, mᵾi kona ila ropa, mana ndurᵾng. Ni kᵾn, kona guⱡ gaⱡa nimba, kump kiraipa elinga mel, kona kilimbᵾmp itim.

Anggelo Kat Ndi, Pikul Ik Ndurᵾng

6 Wote anggelo 7 kat ndi, pikul 7 kat ambulk mormin kᵾⱡ, ik nduing pilik tᵾk kun etᵾng. 7 Ni kᵾn, anggelo kuimbal ni ndi, elim nga pikul ni, ik nduⱡnga kᵾn, kona kup mong ropa, ndip na, mema na mbᵾ, rukᵾrᵾⱡa etᵾk, mᵾi kona ila mana orung. Mᵾi kona na, nde na mel mbᵾ, oi nduk raldika endᵾk kᵾn, mᵾi oi ti kᵾn, nde nga oi ti kᵾn, ᵾi ongum na mel mbᵾ, ndip ndi nomba pora ndurum.

8 Wote, anggelo 2 ni ndi, elim nga pikul ni, ik nduⱡnga kᵾn mel ti, kᵾndᵾr ei, komnga mong mam ti, ndip norum ni mel itim. Wote mel ei, num kuta ila rok mana nduⱡmina kᵾn, ᵾldᵾ ronggᵾt mema rᵾrᵾm. 9 Num kuta ila nga oma na mel mormin mbᵾ nga rᵾⱡaip tenda ti, kolk pora ndurᵾng. Ei kᵾn, nu sip minal tetmᵾn mbᵾ nga, i ku etᵾk, rᵾⱡaip tenda ti etᵾk kit mondrᵾng.

10 Wote, anggelo 3 ni ndi, elim nga pikul ei, ik nduⱡnga kᵾn, muⱡ ila mipil ou ti, ndip anmbil mel kiya nomba, mana omba kᵾn, mᵾi ila nu mam mbᵾ nga rᵾⱡaip tenda tila mana orum. Wote nu pukpa ui mbᵾ nga rᵾⱡaip tenda tila i ku, etpa mana urum. 11 Mipil ni, mbi tek, Kombila iti ti, nᵾtᵾng. Nu nimbᵾ nga rᵾⱡaip tenda ti, mipil Kombila iti ei ndi ambuⱡnga, wamp puⱡi ndi, nu ei kolk norung ila kolk pora ndurᵾng. Nambuⱡ emel, nu ei, kombila itim.

12 Wote, anggelo 4 ni ndi, elim nga pikul ni, ik nduⱡnga kᵾn, ant ei nga punt ronggᵾt kᵾn, kalimp ei nga punt ronggᵾt kᵾn, mipil na kᵾⱡ nga punt ronggᵾt kᵾn, etᵾk kit mondrᵾng. Mel kᵾⱡ nga ti, ti nᵾk, rᵾⱡang ngormᵾn uⱡ ei nga, punt ronggᵾt elpa elpa rumbᵾⱡ murum. Ni kᵾn, ant ei nga rᵾⱡang ngorum uⱡ ei nga, punt ronggᵾt rumbᵾⱡ murum. Wote rumbuldi uⱡ ei, mel kit pitim.

13 Wote na ndi, kᵾndᵾr mel, wi muⱡ ila kᵾi ndowa ti, mbur nimba mba kᵾn, ke ronduⱡ nimba mel, “Anggelo raldika mormin kᵾⱡ ndi, pikul ik nduing enmin. Ei nga, mᵾi kona wamp mbᵾ kᵾn, kont ama minal enim ei ka!” nitim.